Equipo de Dinamización Lingüística

Exposición colectiva de arte, Letras Galegas 2011

2011-03-10T04:13:00.000-08:00

Convocatoria de creación artística

inspirada na obra poética de

Lois Pereiro

Durante o mes de maio realizaremos na escola de idiomas unha exposición de obras creadas a partir de textos poéticos de Lois Pereiro.

Aquelas persoas que desexen participar poderán facelo de acordo coas seguintes

BASES:

1. Serán obras orixinais de pintura ou escultura.

2. Estarán motivadas ou inspiradas nun poema ou unha parte dun poema de Lois Pereiro.

3. As obras entregaranse na Escola de Idiomas de Vigo antes do venres 22 de abril. Cubrirase un impreso de depósito da obra e outro de recollida ao finalizar a exposición.

4. Xunto coa obra tamén se fará chegar unha copia dixital da mesma para a súa publicación en catálogo.

5. As obras serán aprobadas para a súa exposición por un equipo de persoas vinculadas ao mundo da arte.

6. Xunto con cada cadro entregarase o texto no que se inspira, para a súa colocación ao lado da obra.

Máis información sobre o autor homenaxeado:
Culturagalega.org
Galipedia

Exposición sobre as Irmandades da Fala

2011-01-28T03:17:00.000-08:00

Durante o mes de febreiro poderedes visitar na Escola de Idiomas a exposición

A Galiza das Irmandades

realizada pola ASPG (Asociación Sociopedagóxica Galega).

Consta de paneis nos que está representadas as principais etapas de formación e desenvolvemento deste movemento nacionalista galego nacido en 1916 e que foi o xermolo da gran Xeración Nós que fixo brillar a cultura galega en todo o mundo durante o primeiro terzo do século XX.

Concurso de Postais de Nadal electrónicas

2010-11-12T03:20:00.000-08:00

Postal de Nerea Iglesias

Resultado do concurso:

Logo de votaren os membros do EDL da escola as postais presentadas, resultaron dúas elixidas con maior número de votos:

Nerea Iglesias
Socorro Galvis

Os premios son 50€ e 30€ en libros que poderán elixir na libraría Andel de Vigo.

Concurso
Postais de Nadal electrónicas con lemas sobre o galego.

En épocas de ecoloxía e crise, esta é unha das formas máis rápidas e económicas de felicitar as persoas que coñecemos.
Como sabemos que non hai moitas postais en galego na rede, invitámosvos a que contribuades a que quen quixer poida copialas e pegalas nos seus correos electrónicos.

As postais que enviedes serán expostas neste blog para que todo o mundo poida acceder á súa copia e difusión.

Haberá premios en libros para as postais máis suxestivas.

O xurado estará composto por persoas pertencentes ao Equipo de dinamización Lingüística da escola de idiomas

Enviádeas ao mail do EDL (eoi.vigo.enl@gmail.com)

Prazo: ata o Nadal.

Aquí tendes un exemplo máis elaborado:

Facemos unha postal de Nadal

View more presentations from Xosé Ribeira.

Postais que podemos ogfrecervos para copiar e enviar nos vosos correos:

Amelia Losada

Adrián Alonso

Socorro Galvis

Teresa Dorado

Concepción Álvarez

Festa do Magosto 2010 na EOI

2010-11-09T02:49:00.001-08:00

Festa do Magosto

na escola de idiomas

Mércores 10 de novembro

Nun fresco serán de novembro, na véspera de san Martiño, a EOI volveu encher a súa entrada principal do agradable recendo das castañas asadas.

Foron centos de alumnos e alumnas os que se achegaron ao longo do tempo que durou a festa, principalmente nas entradas e saídas das aulas, os que degustaron os cincuenta quilos que dispuxemos para este ano.

Foi unha organización na que a Asociacion de Alumnado e o Equipo de Dinamización Lingüística estiveron toodo o tempo coidando do bo funcionamento e atención a todo o mundo.

Non faltaron castañas e bebidas para quen se achegou e participou deste ancestral ritual gastronómico do noso país.

Non só respiramos o arrecendo do magosto, senón tamén o arrecendo da nosa raíz, da nosa cultura e do noso idioma.

Temos unha pequena galería de imaxes para quen queira achegarse a algúns dos seus momentos.

2010-11-07T04:16:00.000-08:00

Programa "BOCABERTA" da Secretaría Xeral de Política Lingüísitca

2010-11-06T04:09:00.000-07:00

Xa está en marcha o programa Bocaberta 2010-2011, unha iniciativa coa que a Secretaría Xeral de Política Lingüística busca promover a lingua galega entre os rapaces e rapazas de 3 a 18 anos. As actividades que conforman Bocaberta están elaboradas desde os intereses dos nenos e dos mozos co obxectivo fundamental de propiciar a súa participación activa a través da palabra.

Este programa de dinamización lingüística lévase a cabo en colaboración con 14 entidades, entre as que hai editoriais, discográficas, empresas de dinamización propiamente dita e artistas. A natureza das actividades responde aos intereses dos nenos e dos mozos e cobre un amplo abano de tipoloxías. En total, 747 accións coas que a Secretaría Xeral de Política Lingüística chegará a máis de medio millón de rapaces e rapazas e estará presente en todos os concellos de Galicia.

O calendario de actividades pódese consultar na web da SXPL.

Videoconferencia vía web Do CERN a Compostela coa Física de Partículas.

2010-11-04T04:32:00.000-07:00

Con motivo da celebración da Xornada pola Ciencia en Galego, a Coordinadora Galega de Equipos de Normalización e Dinamización Lingüística e o Departamento de Física de Partículas da Universidade de Santiago de Compostela convidan a todos os centros educativos non universitarios a participar na videoconferencia vía web Do CERN a Compostela coa Física de Partículas.

Nela, investigadores galegos do CERN (Laboratorio Europeo de Física de Partículas) e da Facultade de Fisica da USC explicarán os proxectos científicos que desenvolven na actualidade. Ademais de seguir a videoconferencia, os centros escolares que desexen participar terán a posibilidade de interaccionar con eles vía chat.

A videoconferencia terá lugar o xoves 4 de novembro entre as 10:30h e as 11:30h a través dunha sala virtual de fácil manexo.

Os centros interesados (ata un máximo de 100) deben pórse en contacto coa CGENDL.

Campionato de Trivial Día da Ciencia en Galego

2010-11-03T10:33:00.000-07:00

O Día da Ciencia en Galego é unha xornada dirixida ao mundo do ensino e a toda a sociedade co obxectivo de expresarmos que o galego é unha lingua axeitada para a transmisión do coñecemento científico e tecnolóxico e para divulgar experiencias escolares pensadas e desenvolvidas en galego.O Día da Ciencia en Galego está adicado a Ramón Mª Aller Ulloa, Afonso X e James Clerk Maxwel.

A xornada terá lugar o día 4 de novembro de 2010 e o profesorado, xunto co alumnado, pode participar organizando libremente unha actividade de divulgación adaptada a cada realidade e aos diferentes niveis educativos. A AS-PG, que participa nesta convocatoria, convoca un Campionato de Trivial

Presentación dun novo libro

2010-11-02T10:47:00.000-07:00

O próximo venres 5 de novembro ás 18,30 h. na Casa Galega da Cultura (praza da Princesa, 2), terá lugar o acto de presentación en Vigo do libro

ESTUDOS XURÍDICOS SOBRE O DECRETO PARA O PLURILINGÜISMO

de Luís Villares Naveira (coord.).

O mesmo día haberá actos semellantes na faculdade de Filoloxía, ás 12.00h, e, na mesma Casa Galega da Cultura, ás 20.00h, para o público en xeral.

Organizan: Queremos Galego - A MESA pola Normalización Lingüística - Área de NL da Universidade de Vigo - Coordinadora de ENLs de Vigo e bisbarra - Edicións Laiovento

Campaña "O galego é o noso medio natural"

2010-11-01T10:39:00.000-07:00

http://www.coordinadoraendl.org/galegonatural/

O campus universitario vigués acolleu a presentación de “O galego é o noso medio natural”, unha campaña que nace da colaboración institucional da Área de Normalización Lingüística da Universidade de Vigo coa Coordinadora Galega de ENDL. Esta iniciativa de vocación ecolingüística procura vencellar a conciencia lingüística e a ecolóxica, mostrar o perigo da perda e/ou mestura de linguas e/ou especies ecolóxicas, convocar á comunidade educativa e á sociedade galegas á reflexión sobre a responsabilidade que temos cara á lingua propia e cara ao noso medio natural, así como potenciar o uso do galego.

A campaña materialízase na edición de diversos materiais (camisolas, adhesivos, petates, gorros, chapas, etc.), entre os que destaca un caderno-ecoguía, elemento central que ten como obxectivo transmitir, principalmente entre o alumnado, mensaxes sobre a perda, a mestura e a recuperación de especies e de linguas.

Queremos Galego convoca a 4ª etapa do “Camiño pola Lingua”

2010-10-29T10:10:00.000-07:00

Domingo, 31 de Outubro · 7:30 - 17:30

Treito: A Ponte Ulla-Compostela

Son 18 quilómetros que comezan na gasolineira da Ponte Ulla, situada na nacional 525, Km 322, na marxe dereita da estrada en dirección Santiago.

De Ourense saímos ás 7:30 do Parque de San Lázaro. Se queredes saír de Ourense no autobús podedes reservar a praza no 639 519 242, o prezo, para os que non o aboasen nas anteriores etapas, é de 5 euros.

Chegaremos arredor das 8:30 á gasolineira, polo que ás 8:45 deberiamos estar camiñando. Os que vaiades desde outras zonas tede en conta este horario para non atrasar a saída.

Para as persoas que non poidan facer a etapa completa hai un punto de encontro para facer a entrada en Compostela con todo o grupo. Atoparémonos no Cruceiro do Sar arredor das 13:30

Ao chegar a Praterías, arredor das 14:00 h, teremos un acto reivindicativo e, ao remate, xantaremos todo o grupo. O lugar acordarémolo en función do tempo que faga.

Círculo Poético Aberto

2010-10-15T11:22:00.000-07:00

Penúltimo acto quere convidarvos ao próximo Círculo, este mes será o sábado 30. Sabede que contamos convosco para participar no acto con poesía, música, performance, etc.

Apúntate e acompáñanos. Ademais do colectivo xa confirmaron a súa participación neste acto:
Iolanda Aldrei (poesía)
Pere Tobaruela (autor da novela " Na cerna da selva")
Belém Grandal (poesía)
Jose M. Garnelo (música, audiovisual)
Gaspar Domínguez (poesía)
Alfonso Rodríguez (poesía)...

A Irmandade dos Apañacastañas convoca o Premio Apalpador para actividades escolares e extraescolares

2010-10-15T10:52:00.000-07:00

Este ano convocamos por primeira vez un premio para homenaxear a todos aqueles que axudan ao espallamento da figura do Apalpador e para os que non a coñezan, que se impliquen na recuperación desta parte do noso patrimonio inmaterial.

O Apalpador é un personaxe mítico galego que baixa polo Nadal a levarlles os agasallos aos nenos. Entra de noite nos seus cuartos cando están durmidos e apálpalles a barriguiña por ver se están mantidos e déixalles, ademais dos xoguetes, unha presa de castañas.
Este personaxe ten un tronco común con outras tradicións europeas e do norte de España e ben seguro a mesma orixe, pero en Galiza estaba practicamente esquecido. O rito da Noite do Apalpadoiro foi descrito por varios estudosos e a figura do personaxe refírese na zona da montaña lucense e, nomeadamente, no Courel. Tamén existen referencias no oriente ourensán.

Toda a información para participar podedes atopala en http://www.apalpador.com
Moitas grazas e, a participar!

II Curso de Formación sobre o Patrimonio Lúdico

2010-10-15T10:46:00.000-07:00

Baixo o título "O xogo tradicional e as didácticas específicas", organizan en Melide a Asociación Galega do Xogo Popular e Tradicional e o movemento de renovación Pedagóxica Nova Escola Galega. O curso pretende afondar no tratamento dos xogos tradicionais desde a óptica, nomeadamente, das didácticas específicas de disciplinas como a Música, as Artes, as Ciencias Naturais ou as Tecnoloxías, e contará coa participación dun dos máis recoñecidos especialistas no mundo sobre o tema, o profesor catalán Pere Lavega i Burgués.

A actividade está homologada, con 12 horas de formación, por parte da Consellería de Educación e Ordenación Universitaria, e durante a mesma renderáselles homenaxe a Maruxa Barrio e Henrique Harguindei, investigadores pioneiros en Galicia no estudo das prácticas lúdicas tradicionais e responsables da conferencia de clausura do curso.
Máis información (e matrícula en liña) nas páxinas web da AGXPT e de Nova Escola Galega.

Peregrinaxe pola Lingua entre Ourense e Compostela

2010-10-10T13:23:00.000-07:00

A iniciativa desenvolverase en catro etapas sucesivas, os domingos 10, 17, 24 e 31 de outubro, voltando en autobus a Ourense ao remate de cada etapa, logo dun xantar compartido e de plantar unha árbore cunha mensaxe a prol do noso idioma para @s camiñantes das xeracións futuras

Trasno Hackfest organiza a "Trasnada '10"

2010-10-10T13:08:00.000-07:00

Evento de traballo semipúblico para o avance da localización ao galego e formación de novos tradutores.

Lugar e Data

Ordes, Galicia. 16 de Outrubro do 2010

Descrición

Evento de mellora, colaboración, debate de procesos e proxectos de localización de aplicativos libres ao Galego[1]. Con apioio particular (iniciación guiada) a novos interesados na localización.

Obxectivos

Debate de terminoloxía técnica problemática na lingua galega para a aplicación dos cambios acordados.
- Coido que o debate terminolóxico mellor por listas de correo, pois permite referencias a fontes, a posibilidade de que queden rexistrados os motivos das escollas, todos poden participar (pénsese en quen non asista), etc. ─ Adrián (e logo?) 07:53, 22 setembro 2010 (UTC)
Creación de grupos de traballo para a mellora da calidade das traducións ao galego de aplicativos libres.
Creación de grupos de rescate de tradución para proxectos que o precisen.
Descrición de procesos e ferramentas usados na tradución de aplicativos libres.
Presentación de aplicativos que axuden á verificación ortográfica, gramatical e técnica das cadeas.
Revisión dos principais aplicativos.
Remisión de traducións a upstream desde os distintos proxectos (Ubuntu, Suse, Fedora).
Sesión de titorización de novos localizadores.

Máis información na web de Trasno Hackfest

Queremos Galego organiza "O circo da lingua"

2010-10-10T12:59:00.000-07:00

Política Lingüística presenta a Rede de dinamización lingüística

2010-09-24T10:58:00.000-07:00

A Secretaría Xeral de Política Lingüística presentou hoxe a Rede de dinamización lingüística no marco dos XII Encontros para a Normalización Lingüística, que organiza o Consello da Cultura Galega. A través desta iniciativa –cuxa orde de creación foi publicada esta semana no Diario Oficial de Galicia– a secretaría xeral busca congregar as entidades con competencia na promoción do galego coa finalidade de potenciar o proceso de extensión do uso desta lingua de xeito coordinado e planificado desde o ámbito local.
Continuar lendo a noticia.

Concurso de monologos en lingua galega "Que me dis"

2010-09-24T10:53:00.000-07:00

Desde o Servizo de Normalización Lingüística do Concello de Narón, dependente da Concellería de Cultura, poñemos en marcha o I Concurso de Monólogos "Que me dis!!".

Este concurso, que ten como obxectivo promover o emprego da lingua galega nas novas tecnoloxías entre a cidadanía, consiste na gravación de monólogos, tanto en formato vídeo coma audio, que serán colgados na páxina web do concello. As únicas condicións son que estean realizados en lingua galega e en clave humorística.

Os premios aos que podedes optar son un ordenador portátil, unha cámara fotográfica dixital e un MP4.

Animámosvos a todos e todas a que vos acheguedes ás novas tecnoloxías para presentar as vosas propostas. E non vos preocupedes porque estamos á vosa disposición para explicarvos como mandalas a través da web. Podedes realizar as vosas consultas no teléfono 981337700 ext 1516 ou 607223794 (Adela); ou ben consultalo nas bases do concurso na propia web.

Guillermo Sánchez Fojo
Concelleiro de Cultura

Viaxe ás terras de Rosalía

2010-06-02T03:43:00.000-07:00

O día 29 de maio realizamos unha viaxe aos lugares rosalianos dos arredores de Padrón.

O invitado especial desta xeira, que nos guiou a través da súa espléndida palabra, foi o escritor Anxo Angueira, un dos grandes especialistas na vida e obra de Rosalía neste momento.

Esta viaxe guiada estivo precedida dunha conferencia na escola de idiomas de Vigo, na que Angueira nos deu unha visión anovada e particular da personalidade da nosa escritora nacional. Unha interpretación dende a perspectiva de Rosalía como muller en todas as súas dimensións: como muller comprometida coa súa época, a historia, o mundo intelectual e político.

Mais un dos aspectos máis relevantes foi o seu posicionamento como muller: unha escrita dende a muller, protagonizada por mulleres e escrita para mulleres.

Toda esta disertación estivo engalanada polas recitacións do relator, que engaiolaron ñas persoas asistentes pola calidade e potencia da súa palabra.

Estas recitacións tiveron a súa continuidade nos propios lugares en que Rosalía escribíu os seus versos: a Casa da Matanza en Padrón, a igrexa de Iria, o pazo da Ermida entre a banda de Laíño e a banda de Lestrove... Recitación esta última que foi realizada colectivamente, dende a solaina do pazo, contemplando as paisaxes descritas no poema referido.

Finalizou a viaxe nas Torres de Oeste de Catoira, onde se sitúa un dos episodios dun poema da escritora e que tanta evocación motivou no percorrido por este emblemático lugar da nosa historia medieval. Un percorrido que se completou cunha camiñada polas ribeiras do Ulla enfeitizados pola paisaxe da tarde neste lugar.

Podedes ver unha galería de imaxes máis completa desta viaxe para poderdes descargar as fotos que máis vos gusten.

Excursión ao Courel

2010-04-26T01:59:00.000-07:00

Homenaxe a Uxío Novoneyra
no Courel
Domingo 9 de maio 2010

8.00 h: Saída da Escola de Idiomas.

11.00 h: Camiñada desde a Ferrería de Seoane do Courel con destino a Parada (lugar natal do homenaxeado da Letras Galegas) organizada por AMIGOS DE UXÍO NOVONEYRA.
- 3 Km de percorrido a pé.
- Paradas para recitar poemas de Novoneyra, quen o desexar.
- Actuacións musicais durante o camiño.

13.00 h: Acto de homenaxe, xunto a casa natal do poeta:
- Evocación de Uxío Novoneyra e o seu espazo natural.
- Intervirán músicos e cantautores.
- Os participantes que desexen intervir neste acto deben solicitalo antes a uxionovoneyra@gmail.com.
- Remate con ofrenda floral diante da casa de Novoneyra a cargo dun grupo de escolares do Courel.

15.00 h: Xantar ao aire libre nos soutos que rodean a casa de Novoneyra, con fermosas paisaxes. Cada persoa levará a súa mochila de comida e bebida.

19.00 h: Regreso para Vigo.

22.00 h: Chegada a Vigo, Escola de Idiomas.

Observacións: Dada a variación climatolóxica do Courel recomendamos que leven paraugas ou chuvasqueiros.
Tamén pode estar un día de moita calor, como é típico nos altos cumes do Courel.
Estas variacións teñen que terse moi en conta.
As persoas deben levar na súa mochila comida e bebida, dado que en Parada non hai bares nin posibilidade algunha de adquirir alimentos

Data: Domingo, 9 de maio
Hora: 8.00 h na EOI

Prezo: 5 €

Anotacións: Conserxaría da Escola de Idiomas

Organiza: Equipo de Dinamización Lingüística da EOI

2010-04-22T04:01:00.000-07:00

Nova Escola Galega

achega un novo Vieros da Escola dedicado á sensibilización sobre o patrimonio cultural no rural do país.

A autoría deste traballo é de Chus Diéguez, Humberto Martínez e Cristina Ogando, profesores no IES de Pontecaldelas.

Convocatoria 9 de maio no Courel

2010-04-15T04:10:00.000-07:00

Os Amigos de Uxío Novoneyra, a través da web www.uxionovoneyra.com demandaron no seu día o apoio para que as Letras Galegas de 2010 fosen dedicadas a este poeta, proposta que posteriormente se conseguiu.
Moitas das persoas asinantes fixeron chegar aos promotores do nomeamento varias propostas para que se realice un acto no Courel. Postos en contacto coas asociacións culturais do Courel, todas elas incidiron en apoiar e participar neste acto unitario, convocado xa nesta web para o próximo domingo 9 de maio. Tendo como punto central a figura humana e literaria de Uxío Novoneyra e, tamén, o espazo do Courel, que el reivindicou a protección do mesmo.

Sobre as 11 h., do día mencionado, sairemos da Ferrería de Seoane, nunha camiñada polo camiño antigo do Real, cara á casa natal do poeta, en Parada.
Durante a camiñada faremos unha lectura de seus poemas así como outras actividades. En Parada, será o acto central no que todos están convidados a participar nunha celebración aberta na que se evoque ao poeta e a seu espazo natural, referente vivo da súa obra: “Os Eidos”.
A poesía, a música e as opinións sobre Uxío Novoneyra serán os referentes que asistan a este acto.
Por esta razón vimos a pedir de novo suxestións para que este encontro sexa amplo, dinámico e participativo.

Na páxina web teremos un apartado expresamente dedicado a este acto, onde iremos informando da evolución do mesmo. Para calquera opinión e suxerencia envíenos a súa mensaxe a uxionovoneyra@gmail.com

Con os mellores cumprimentos.

Amigos de Uxío Novoneyra

UXÍO NOVONEYRA (1930-1999)
http://www.uxionovoneyra.com/
DÍA DAS LETRAS GALEGAS 2010

A Asociación Socio-Pedagóxica Galega presenta "Canto de Permanencia" sobre Novoneyra

2010-04-15T04:07:00.000-07:00

Canto de permanencia é o título sob o que se recollen, en formato audiovisual, tres traballos, autónomos mais complementares, sobre a persoa e a obra de Uxío Novoneyra.
1.- Canto de permanencia, documental creativo e obra experimental, que dá título ao DVD, é unha interpretación, en linguaxe cinematográfica, dunha escolma de textos da obra de Novoneyra. Sobre este guión literario sobreponse un guión de ficción para termos unha obra que combina textos con imaxes reais rodadas en espazos simbólicos da obra de Novoneyra e, xunto con estas, outras recreadas en estudios de gravación ou en espazos interiores e con actores, resultando un produto susceptíbel de ser visionado de maneira autónoma e independente de calquera contexto e de calquera coñecemento previo da obra de Novoneyra. Cabe salientar que, coa selección de textos, o guión procura construír unha liña temporal que podería seguir o devir das catro estacións.

2.- O segundo audiovisual, A Certeza de Sermos, recolle un recitado de textos de Novoneyra por el proprio. Son textos até agora non divulgados procedentes dos fondos documentais da AS-PG, agás un cedido polo CIFP Anxel Casal da Coruña. Van unidos argumentalmente por textos de discursos de Novoneyra coa voz en off de Fernando Morán e teñen en común presentan o seu carácter marcadamente social.

3.- Finalmente, e como Extras, o DVD recolle un recitado de versos dedicados a Novoneyra por Manuel María, Méndez Ferrín, Mª Xosé Queizán, Bernardino Graña e García Bodaño xunto con imaxes inéditas da gravación de Canto de permanencia.

Penúltimo Acto - grupo de acción poética

2010-04-13T04:28:00.001-07:00

Recibimos un correo no que nos informan sobre o grupo de acción poética Penúltimo Acto.
No seu espazo web defínense da seguinte maneira:
"O penúltimo acto non ten principio nin final, nin necesita de testemuñas para aseverar que vive en nós e é posíbel e certo, para saír das palabras e convertelas en acción para pervivilas nesta desmesura necesaria. Penúltimo acto para sermos o que habitamos empregando os nomes axeitados e deletrealos a tódolos ventos para achegarnos antes do final á realidade plena. Un acto de fe para resistirnos a ser invisíbeis."

É un lugar aberto á construción colectiva a través das colaboración que calquera pode enviar para a súa publicación.
Animádevos a coñecelo e participar neste "Penúltimo Acto".

Ponte nas Ondas - programa especial

2010-04-13T04:12:00.000-07:00

Dende a organización Ponte nas Ondas recibimos a seguinte comunicación:
O vindeiro venres 16 de abril, a través da nosa páxina web emitiremos a gran programación que estamos a preparar co lema "O tesouro dos avós".
Esta programación, que durará 24 horas , escomezará ás 10 horas (9 no horario portugués) , conterá:

Programas realizados nas escolas e nos institutos

Música

Documentais sobre persoeiros que por idade e coñecementos teñen moito que nos ensinar.

Congreso de Ponte nas Ondas

2010-03-25T03:56:00.000-07:00

23, 24 de abril en Vigo
25 de abril en Melgaço

O Congreso Internacional " PONTES DE CULTURA, PONTES DE FUTURO " sobre os 15 anos de Ponte...nas ondas! preséntase como un evento de reflexión e debate sobre a iniciativa de comunicación que nacía nas beiras do Miño no ano 1995 coa denominación de Ponte...nas ondas!
Desde entón, as actividades impulsadas pola Asociación Cultural e Pedagóxica Ponte...nas ondas! foron ampliando o seu radio de difusión e tamén foron diversificando os seus ámbitos de actuación. Así, desde uns comezos centrados na actividade radiofónica interescolar abórdanse sucesivamente proxectos de ámbito cultural e internacionais ao amparo de institucións como a UNESCO. Neste sentido merece destacar o labor realizado como promotores da Candidatura Multinacional do Patrimonio Inmaterial Galego-Portugués, que contou cos apoios da Xunta de Galicia e dos gobernos de Portugal e España.

A distancia do lobo. Biografía de Uxío Novoneyra

2010-03-25T03:47:00.000-07:00

A Editoria Galaxia acaba de publicar unha nova achega ao coñecmento da figura de uxío Novoneyra.
Antón Lopo, A distancia do lobo. Biografía e Uxío Novoneyra.

Uxío Novoneyra está xa gravemente enfermo e rememora a súa vida, desde O Courel da II República ás rúas de Zúric onde viu, a primeiros da década de 1990, os rapaces anestesiarse con heroína. Xorden así unhas memorias concibidas con aparencia de autobiografía, nas que a figura totémica de Novoneyra o inunda todo. En A distancia do lobo, Antón Lopo utiliza a obra do poeta, as súas entrevistas e os seus discursos para reconstruír a traxectoria vital dun escritor que mantivo a liberdade como principio irrenunciable. A partir dese material, e mediante unha serie de entrevistas con Elba Rey -viúva de Novoneyra- e con amigos e persoas que o trataron en vida, trénzase unha peripecia que se inicia cos estertores da vida e conclúe na infancia.

A represión da ditadura, o principio de liberación dos pobos, a bohemia, o refuxio das tertulias ou as dificultades de forxar un ámbito cultural propio nos comezos da autonomía en Galicia, son algunhas das estacións dun percorrido que fai escintilar a práctica totalidade da poliédrica persoalidade dun home que converteu a poesía nunha forma de comportamento.

Visita guiada ás Salinas romanas de Vigo

2010-03-18T05:04:00.000-07:00

Salinas romanas de Vigo

“A única salina mariña de evaporación solar conservada e musealizada de todo o Imperio Romano.”

Data: Venres, 26 de marzo
Hora: 12.00 h
Lugar: Rúa Rosalía de Castro, 21
(diante do centro de saúde)

Data: Mércores, 28 de abril
Hora: 19.00 h
Lugar: Rúa Rosalía de Castro, 21
(diante do centro de saúde)

(Anotacións na conserxaría da EOI: 20 prazas)

Visita guiada

2010-03-18T04:51:00.000-07:00

Colección de arte galega Caixanova

“Un completo e didáctico percorrido pola Mellor Arte Galega,
ademais dun extraordinario espectáculo para tódolos públicos”

Data: Xoves, 25 de marzoHora: 19.00 h
Lugar: Centro Social Caixanova
Policarpo Sanz, 24

Data: Venres, 9 de abril
Hora: 10.00 h
Lugar: Centro Social Caixanova
Policarpo Sanz, 24

(Anotacións na conserxaría da EOI: 25 prazas)

Visita guiada á musealización do Castro de Vigo

2010-03-18T04:02:00.000-07:00

Musealizacion do Castro de Vigo

“Museo que permite facerse unha idea do tipo de hábitat da poboación

da Idade de Ferro e romanización en Vigo ”

Data: Mércores, 17 de marzo
Hora: 17.00 h
Lugar: Monte do Castro de Vigo

(Anotacións na conserxaría: 25 prazas)

Selección de voces para gravar poemas de Novoneyra

2010-02-14T09:39:00.000-08:00

A Asociación Socio-pedagóxica Galega (AS-PG) está a preparar un vídeo sobre Uxío Novoneyra que estará dispoñíbel a comezos de abril. No vídeo incorpóranse algúns poemas do libro Os Eidos.

A gravación dos textos terá lugar en marzo. Queremos abrir a posibilidade de participar neste documental a todos as persoas que o desexen.
Por iso a as-pg convoca un concurso para a selección das voces (unha voz masculina e unha voz feminina) que recitarán os textos de Novoneyra.

Consultade dende aqui as bases desta convocatoria.

Exposición “Ramón Piñeiro, olladas no futuro”

2010-02-03T07:09:00.000-08:00

Temos na Escola de Idiomas de Vigo unha das exposicións máis importantes sobre a figura de Ramón Piñeiro organizadas en Galicia.

A exposición “Ramón Piñeiro, olladas no futuro” recrea a personalidade dunha das figuras máis representativas e influentes de Galicia da segunda metade do S.XX que puxo a súa vida ao servizo da reconstrución da identidade de Galicia e da dignificación da súa cultura.

Esta exposición consta de 21 paneis nos que se diferencia unha primeira parte: SINGRADURA VITAL (1915-1990) co seu contexto histórico (TEMPO) e en paralelo, como viviu Ramón Piñeiro dita etapa (VIDA).

A segunda parte, CONCIENCIA DA GALEGUIDADE, reúne a obra colectiva: a “Xeración Galaxia” (a Editorial Galaxia e o primeiro Grial, a Editorial Galaxia e a revista Grial e a importancia do idioma) e a súa obra persoal (significado de saudade, galeguismo e nacionalismo e unha cadeira socrática. Contactos, diálogos, compromisos).

Elementos expositivos: 21 paneis, 2 puntos interactivos, 1 documental, 7 vitrinas con obxectos, publicacións e cartas persoais, 1 peana con máquina de escribir e a recreación do seu gabinete.

Fonte: "Verbum" Casa das Palabras de Vigo.

Xornadas de análise da Carta Europea das Linguas Rexionais ou Minoritarias

2010-02-03T02:00:00.000-08:00

Celebranse os vindeiros 22 e 23 de febreiro no Consello da Cultura Galega.

O programa do encontro, coordinado por Alba Nogueira, inclúe a presenza de expertos europeos na CELMR que abordarán cuestións de relevo como o réxime de protección do ensino, a intervención lingüística na vida económica e social, os intercambios transfronteirizos ou réximes de protección, obxectivos e principios da CELMR, entre outros.

A asistencia ás xornadas de análise da Carta Europea das Linguas Rexionais ou Minoritarias é libre e gratuíta. A capacidade do salón de actos onde se realizarán é de cen persoas, polo que todas aquelas interesadas en asistir deberán remitir un correo electrónico ao enderezo loxistica@consellodacultura.org onde conste o seu nome, DNI, teléfono e actividade profesional. A aceptación da inscrición nas xornadas será confirmada pola organización mediante un correo electrónico.

Para máis información prema aquí:

http://consellodacultura.org/?page_id=1610

XI PREMIO DE RELATOS CURTOS E CONTOS “XAQUINA TRILLO”

2010-02-03T01:58:00.000-08:00

Está destinado a fomentar a escritura e lectura en galego entre @s moz@s. Convócase entre estudiantes de ata dezaoito anos dos Institutos de Ensinanza Secundaria e os Centros de Ensinanza Infantil e Primaria. Establecéndose dúas categorías por idades.
O fallo do premio correspóndelle ao Xurado, composto por intelectuais galegos de recoñecido prestixio e farase público o Día das Letras Galegas en Vilagarcía de Arousa.

ÁMBITO TERRITORIAL: Galicia

NÚMERO DE BENEFICIAROS: 125.357 alumnos de ESO E BACHARELATO/ 191.565 alumnos de Infantil e Primaria.

CALENDARIO: Dende o 01/01/2010 ata o 30/04/2010 (DATA LÍMITE DE PRESENTACIÓN DOS TRABALLOS) FALLO XURADO: 13/05/2010.

BASES DO CERTAME:

A Fundación Amigos de Galicia, coa colaboración do Concello de Vilagarcía de Arousa, e o patrocinio da Secretaría Xeral de Política Lingüística, pertencente á Consellería de Educación e Ordenación Universitaria da Xunta de Galicia, convoca o XI Premio de Relatos Curtos e Contos “Xaquina Trillo” para escolares, co dobre obxectivo de fomentar a creación literaria entre os nenos e mozos, e o uso do galego.
Poderán participar todos os escolares galegos ata 18 anos, dentro de dúas categorías (categoría A, ata 12 anos, e categoría B, entre 13 e 18 anos).
Os contos serán de tema libre, debendo ter na Categoría A unha extensión mínima de cinco folios, e de dez na Categoría B. En ámbolos dous casos, deberán presentarse dúas copias mecanografadas, a dobre espazo.
Os contos serán enviados polo seu autor ou polo Colexio/Instituto no que estude.
Establécense os seguintes premios:

CATEGORÍA A*: contos escritos por nenos de ata 12 anos.

1º Premio 200€ e 20 libros
2º Premio 150€ e 20 libros
3º Premio 100€ e 20 libros
4º Premio 75€ e 20 libros

CATEGORÍA B*: contos escritos por nenos de entre 13 e 18 anos.

1º Premio 200€ e 20 libros
2º Premio 150€ e 20 libros
3º Premio 100€ e 20 libros
4º Premio 75€ e 20 libros

*A contía será equivalente en libros premiados para os centros de ensino.

O Xurado estará formado por escritores e profesores galegos, actuando como Secretario con voz pero sen voto, Jesús Busto Peteiro. A súa decisión será inapelable e terá lugar o 13 de maio de 2010, no Concello de Vilagarcía de Arousa.
O lugar de presentación é a sede da Fundación Amigos de Galicia en Rúa Fontecarmoa, nº 63 –baixo, 36600 de Vilagarcía de Arousa (Pontevedra), ou por correo electrónico: informacion@fundacionamigosdegalicia.org, e a data límite de presentación será o 30 de abril de 2010.
Os contos premiados serán publicados nun único libro. Os traballos na súa primeira edición serán propiedade da Fundación Amigos de Galicia.
A presentación a este Concurso supón a aceptación destas BASES, decidindo o Xurado sobre calquera eventualidade non prevista nelas.
Os premios deste certame entregaranse no acto que se celebrará co gallo do Día das Letras Galegas, o 17 de maio de 2010, a celebrar en Vilagarcía de Arousa (Pontevedra).

Organiza Fundación Amigos de Galicia

Colabora o Concello de Vilagarcía de Arousa

Co patrocinio da Consellería de Educación e Ordenación Universitaria – Secretaría Xeral de Política Lingüística.

"55 mentiras sobre a lingua galega"

2010-02-03T01:45:00.000-08:00

A plataforma a prol da defensa e promoción da lingua galega ProLingua
presentará o próximo venres 5 de febreiro a súa primeira publicación
titulada "55 mentiras sobre a lingua galega", coordinada polo profesor
da Universidade de Vigo Xosé-Henrique Costas.

En Vigo será o venres, 5 de febreiro ás 20.00 h na Casa Galega da Cultura, praza da Princesa.

Esta publicación pretende ser un argumentario sinxelo e clarificador,
ao tempo que sólido e rigoroso, que axude a sociedade galega a
comprender e superar aquelas valoracións e interpretacións
subxectivas, ideoloxizadas desde unha óptica exclusivamente
partidista, erróneas ou perversas que perseguen o obxectivo de
actuaren de freo ao camiño da necesaria reposición e normalización de
usos para a lingua galega no seo da súa sociedade.

Co gallo de ofrecer unha análise dos prexuízos máis comúns que difunden os negacionistas do idioma, sae publicado este esperado libro útil, unha obra rigorosa que, paseniño e cun ton distendido, avanza até desmontar por completo, unha por unha, as principais falacias que ao correr da historia se veñen vertendo sobre a lingua galega, facendo fincapé naquelas que, por diversas razóns que tamén o libro pon de relevo, a día de hoxe teñen un maior calado na sociedade.

Xa que logo, podemos falar desta publicación como dunha reacción organizada, limpa e contundente contra as difamacións daqueles que, por complexo, mesquindade ou ambas as dúas cousas, só buscan o esmorecemento da lingua propia de Galicia, o galego.

Nos próximos días ofreceremos no noso blogue, http://prolinguagalega.org, cumprida información da multipresentación que deste libro se fará simultaneamente en máis de medio cento de localidades espalladas polo noso país.

BASES DO XVI PREMIO DE POESÍA “O GRELO”

2010-02-03T01:40:00.000-08:00

O Premio de Poesía O Grelo está concibido coma un concurso estrictamente en galego para dar a coñecer a poetas noveis, publicando o seu primeiro libro pola dificultade que isto representa.

De O Grelo xurdiron figuras destacadas nas letras galegas hoxe en día como Marta Dacosta, Anxo Angueira, Modesto Fraga, Samuel Solleiro, entre outros.

O Xurado confórmano destacados poetas e escritores galegos, de recoñecida solvencia intelectual.

O Fallo do Xurado farase público e entregarase o Día das Letras Galegas en Vilagarcía de Arousa.

ÁMBITO TERRITORIAL: Galicia

NÚMERO DE BENEFICIAROS: Tod@s @s autores interesad@s.

CALENDARIO: Dende o 01/01/2010 ata o 30/04/2010 (DATA LÍMITE DE PRESENTACIÓN DOS TRABALLOS) FALLO XURADO: 15/05/2010.

BASES DO CERTAME:

A Fundación Amigos de Galicia, coa colaboración do Concello de Vilagarcía de Arousa, e o patrocinio Secretaría Xeral de Política Lingüística, pertencente á Consellería de Educación e Ordenación Universitaria, convoca o XVI Premio de Poesía O Grelo, para fomentar o uso do galego entre as xeracións máis novas, sabendo que nelas está de xeito importante o porvir da literatura de Galicia, e da nosa lingua.
Establécese un único premio en lingua galega de 1.000€ para o gañador, e 100 exemplares do libro premiado.
Poderán participar poetas e escritores de calquera nacionalidade, a condición de que presenten os seus traballos en idioma galego e non teñan publicado ningún libro.
O tema será libre e cunha extensión mínima de 600 versos (imprescindible).
Os orixinais presentaranse por quintuplicado, mecanografados a dobre espazo, baixo plica, e serán enviados á sede da Fundación Amigos de Galicia en Rúa Fontecarmoa, nº 63 – baixo, 36600 de Vilagarcía de Arousa, ou por correo electrónico a informacion@fundacionamigosdegalicia.org. O prazo de presentación finaliza o 30 de abril de 2010, ás 14.00 hrs.
Os traballos premiados serán propiedade dos seus respectivos autores, agás a primeira edición que será publicada pola Fundación Amigos de Galicia. En posteriores edicións deberá constar a súa condición de “Premio O Grelo”, Fundación Amigos de Galicia.
O Xurado estará formado por escritores e xornalistas galegos. A súa decisión será inapelable e terá lugar o 15 de maio de 2010, no Concello de Vilagarcía de Arousa.
Os orixinais premiados non serán devoltos aos seus autores, nin os organizadores manterán contacto con eles.
A interpretación destas bases corresponderá exclusivamente ao Xurado que outorgará o premio. O feito de presentarse a esta convocatoria supón a conformidade do concursante coas presentes bases.
Os premios deste certame entregaranse no acto que se celebrará co gallo do Día das Letras Galegas, o 17 de maio de 2010, a celebrar en Vilagarcía de Arousa.

Organiza Fundación Amigos de Galicia

Concurso Procurando poema e poeta

2010-02-03T01:31:00.001-08:00

Rosalía, Carvalho, Seoane e Novoneira.

Neste ano 2010 celebramos o 125 aniversario da morte de Rosalía, o primeiro centenario do nacemento de Ricardo Carvalho Calero e de Luís Seoane.

Uxío Novoneira é o autor homenaxeado no Día das Letras Galegas. Todos eles e ela piares da cultura galega actual.

A AS-PG levará a cabo ao longo do ano unha serie de iniciativas tendentes a divulgar e popularizar a obra destes autores e autora.

A primeira iniciativa é esta nova edición do concurso Procurando poema e poeta.

O concurso consiste en recompoñer un texto cuxas palabras están desordenadas e a partir de aí, mediante un sistema de pistas, intentar descubrir quen o escribiu.

Durante os meses de febreiro, marzo, abril e maio imos presentar un texto dun dos autores citados combinado con outros dous textos de poetas contemporáneos. Haberá catro probas consistentes en recompor os textos sabendo que un destes textos será de Rosalía, Carvalho, Seoane ou Novoneira e os outros dous que aparecerán mesturados con este serán de outros dous autores ou autoras. Publicaranse neste enderezo, onde tamén aparecerán as Bases. Para entrar pode facelo como usuario/a rexistrado ou como convidado/a.

Para quen consiga recompor todos os textos (as catro probas) haberá un premio de 350€. Se ademais esa persoa é socio ou socia da AS-PG ese premio será de 450

Poderán participar tamén neste concurso, ademais de persoas a título individual, os Equipos de Normalización e Dinamización Lingüística dos centros escolares. Neste caso a persoa responsábel do equipo realizará a inscrición indicando que é en nome do equipo. Para iso deberá enviar un correo a webquests@as-pg.com e o correo remitente deberá ser o do centro educativo. No caso de resultar gañador un Equipo de Normalización e Dinamización o premio será considerado como se dun socio ou unha socia da AS-PG se tratar, isto é 450€.

O período de inscrición está aberto desde o 27 de xaneiro ao 27 de febreiro. Pasado ese día non se admiten máis inscricións. Para participar é imprescindíbel facer a inscrición previa, quer enviando un correo a webquests@as-pg.com quer facendo a inscrición no enlace http://www.as-pg.com/teleformacion/ e seguindo as indicación que van aparecendo

BASES

Se desexares participar nesta caza do tesouro deberás enviar un correo a webquests@as-pg.com indicando: Nome e apelidos, Documento de Identidade e correo electrónico. Tamén te poderás inscribir directamente nesta ligazón. A AS-PG utilizará só o correo electrónico como medio de comunicación coas persoas participantes. O derradeiro día para enviar os textos correctamente recompostos, indicando ademais autor e autora é o día 20 de xuño. Os textos irán publicándose mes a mes e poderán enviarse cando estiveren resoltos. Por se houber algún tipo de problema cos envíos admitiranse os textos que cheguen até o día 22 de xuño sempre que na data e hora do remitente figure unha referencia anterior ás 23:59 horas do día 20 de xuño.

A partir da publicación do primeiro dos catro cazatesouros a AS-PG publicará na súa web unha serie de pistas para os participantes. As pistas serán publicadas no seguinte enderezo

O día 25 de xuño publicaranse os textos e darase a coñecer a persoa gañadora. Todas as persoas que o desexen poden enviar os textos que vaian compoñendo a webquests@as-pg.com e recibirán contestación indicando se está correcto ou non. Estes textos, que poden ou non corresponder cos orixinais que se están a procurar, poderán ser publicados na web da as-pg.

Para ter dereito ao premio é necesario recompor os tres poemas de cada un dos catro cazatesouros que se publicarán aquí. Son en total 12 poemas. Se houber máis dunha persoa que acerte, o gañador ou gañadora decidirase por sorteo. En calquera caso, se houber empate terán preferencia as persoas asociadas á as-pg. O premio será de 350 €, agás no caso de a persoa gañadora estar asociada á as-pg e coas cotas ao día no momento de finalizar o prazo de entrega dos textos. Neste caso o premio será de 450€, como tamén no caso dos Equipos de Normalización e Dinamización. Se non houber ningún acertante aplicaranse os criterios anteriores para quen acertar 11, 10 ou 9 poemas. Neste caso os premios diminuirán en 100 €.

Calquer outra cousa non explicitada anteriormente será interpretada e aclarada pola as-pg, non cabendo contra ela ningunha reclamación.

A participación no certame supón aceptar as bases.

A Coruña 26 de xaneiro de 2010

Xornadas: Compartimos unha cidade, compartamos as nosas linguas

2010-02-03T01:20:00.000-08:00

O Concello de Vigo a través das concellerías de Normalización Lingüística e Benestar Social organizan as primeiras xornadas "Compartimos unha cidade, compartamos as nosas linguas" inxeridas no programa "En galego tamén noutros mundos".

As xornadas desenvolveranse os martes de febreiro, a excepción do martes de entroido día 16 e o martes 2 de marzo.

Día 2 de febreiro:

-A diversidade lingüística

-Modelos de integración: Burela

Día 9 de febreiro

-A realidade dos organismos e persoas que traballan no eido da inmigración

Día 23 de febreiro

-A experiencia das persoas inmigrantes en Galicia

Día 2 de marzo

-O futuro da integración

O horario das xornadas é de 17:00h a 20:00h, no auditorio da rúa Areal, 46 (antiga reitoría).

A Real Academia da Lingua analiza o borrador do decreto

2010-01-20T04:38:00.000-08:00

A nosa principal institución da lingua fixo a súa análise do borrador do decreto elaborado pola cosnellaría de Educación.
Tivo unha importante repercusión nos mesios de comunicación debido á espectativa que había ao redor do seu ditame.
A súa análise foi contundente na desaprobación do actual borrador. Foi unha declaración unánime de toda a Real Academia da Lingua que representa unha das voces máis autorizadas sobre esta materia.

Comparativa entre o Decreto 124/2007 e o Decreto do plurilingüismo

2010-01-20T04:30:00.000-08:00

A Coordinadora Galega de Equipos de Normalización e Dinamización Lingüística realizou un meritorio traballo de comparación entre os dous decretos (o agora en vigor e a proposta do actual goberno).

É unha interesante lectura que nos achega maior claridade nos cambios que realmente se poden producir coa aprobación da actual proposta de decreto.

Novo Decreto plurilingüe. Reaccións.

2010-01-15T05:55:00.000-08:00

Son moitas as reaccións e pronunciamento os que está provocando a aparición deste novo borrador de decreto.
Nós remitímosvos á web da Coordinadora de Traballadores/as de Normalización da Lingua, on de poderedes atopar unha relación moi completa de todo tipo de entidades e particulares que están aparecendo na prensa e nas respectivas webs.

Proxectos gañadores dos Premios de Innovación en Normalización lingüística

2010-01-08T01:54:00.000-08:00

"Os sete centros galardoados deste ano, que recibirán un premio de 3.000 euros, foron o CEIP Aguiño, de Ribeira, por Mar de mulleres asolagadas; o CEIP A Gándara, de Carballo, co proxecto Mergullados nos mares da palabra; o CEIP A Pedra, de Bueu, polo traballo Galegos e galegas de aquí e acolá; o CEIP Bergantiños, de Carballo, que se presentaron con Casas de aquí e acolá; o CEIP Quintela, de Moaña, por En galego pola rede; o IES Menéndez Pidal, da Coruña, polo proxecto A aldea global: Galicia é máis Galicia cando é todos os mundos; e finalmente, o IES Sardiñeira, tamén da Coruña, premiado por LinguaTIC@s." ... seguir lendo a noticia

Análise inicial do novo decreto pola Coordinadora Galega de EDNL

2010-01-03T08:56:00.000-08:00

A Coordinadoa Galega de Equipos de Dinamización e Normalización Lingüística emitiu un primiero comunicado que analiza o contido do borrador do novo decreto.
Podedes lelo neste enlace e mesmo descargalo en PDF.

Por outra parte tamén podedes descargar un resumo equemático ben elaborado por parte do EDNL do IES de Melide.

Certame de Postais de Nadal 2009

2009-12-05T12:13:00.000-08:00

(postal de Nerea Iglesias)

Postais electrónicas con lemas sobre o galego

O Parlamento galego acaba de anunciar unha feliz idea: O Parlamento de Galicia afonda no plan de austeridade e suprime os agasallos de Nadal.
Neste plan de aforro de gasto inclúe que tamén os parlamentarios/as envíen as postais de Nadal vía correo electrónico.
Como sabemos que non hai moitas postais en galego na rede, invitámosvos a que contribuades a que as nosas señorías teñan onde escoller.

As postais que enviedes serán expostas neste blog.

Haberá premios en libros para as postais máis suxestivas.

O xurado estará composto por persoas pertencentes ao Equipo de Normalización Lingüística da escola.

Enviádeas ao mail da escola de idiomas (eoi.vigo@edu.xunta.es), ou ao mail do ENL (eoi.vigo.enl@gmail.com)

Prazo: durante todo o mes de Nadal.

(postal de Nerea Iglesias)

"Tentei reflectir o encanto que xa de seu ten o galego como lingua, como se contaxia, como se reproduce cal mitocondria e, do mesmo xeito que á súa terra, como se lle quere."

Dende Viveiro, Lugo, chéganos esta proposta de MARÍA ROLLE

En galego con sumo gusto

2009-12-04T16:37:00.000-08:00

O presidente da Asociación de Funcionarios pola Normalización Lingüística, Xosé González Martínez, invítanos este Nadal a exercermos a galeguidade de poñer nas nosas mesas produtos etiquetados en galego:

"A reivindicación dunha maior presenza social da lingua galega implica que esta se estenda aos ámbitos empresarial e comercial. Non ten fundamento o argumento utilizado para negarse a etiquetar en galego aducindo que a lingua galega pecha portas noutros mercados. Iso non é certo. Que llelo digan ás cento cincuenta e sete adegas galegas que etiquetan no noso idioma e están nos mercados internacionais." Ler a noticia completa...

Esta é unha importante inicaitiva que debemos divulgar entre todas as persoas ás que poidamos chegar. Estaremos protexendo e dinamizando a cormecialización dos nosos produtos e, principalmente, estaremos contribuíndo á difusión do noso idioma e a súa normalización no comercio e na empresa.

Aqui poñemos á vosa disposición unha ampla listaxe de produtos para o Nadal etiquetados en galego sacada da páxina web da Secreataría Xeral de Política Lingüistica.

Moitas grazas tamén ao editor Manuel Bragado, quen nos
amplía esta chamada de atención sobre os produtos etiquetados no noso idioma cun fermoso artigo publicado en Faro de Vigo:
"Cada vez son máis numerosas as empresas que escollen a lingua propia do país para a etiquetaxe dos seus produtos e servizos. Tras o sector dos produtos culturais, dende hai décadas pioneiro nesta aposta, xa son moi diversos os sectores económicos e comerciais que prefiren utilizar o galego como lingua vehicular das súas etiquetas xa que nela atopan un valor engadido que incrementa a competitividade e atractivo dos seus produtos tanto no mercado interior como cando son exportados. Dende o sector vitícola ao das augas minerais e gasosas, pasando polo do mel, do aceite e dos produtos cárnicos, dende o da agricultura ecolóxica ao leiteiro, o galego ten unha presenza habitual na etiquetaxe destes produtos como mellor indicador de orixe con autenticidade." Continuar lendo todo o artigo.

2009-12-04T16:34:00.000-08:00

Na web da Coordinadora Galega de Equipos de Dinamización e Normalización Lingüística podedes atopar un modelo de postal de Nadal dinámico que podedes personalizar co texto que desexedes para enviar a outras persoas.

Premede no seguinte enlace para ver a felicitación dinámica da propia Coordinadora.
Aquí ofrecemos unha foto estática da feliciatación:

Animádevos.

Plataforma Queremos Galego convoca reunión

2009-12-04T16:33:00.000-08:00

I Simposium Internacional Ecolingua en Vigo

2009-12-04T16:30:00.000-08:00

Organizado polo Instituto Galego de Estudos Europeos e Autonómicos (IGEA)

"O I Simpósium Internacional Ecolingua 2009 analizará en Vigo os próximos días 17, 18 e 19 de decembro a realidade lingüística de Galicia a través de máis de vinte conferencias e mesas redondas, cincuenta especialistas darán a coñecer modelos e políticas lingüísticas no ámbito do estado e no plano internacional en países plurilingües." ler o resto da noticia en Xornal

Tamén podedes accdeder ao programa do simpósium.

Tamén podedes descargar o tríptico do simósium.

Recomendámosvos a lectura da intervención de Xabier P. Docampo no Simposium.

CONVERS-ANDO en Vigo

2009-12-04T16:29:00.000-08:00

CONVERS-ANDO é un fermoso e necesario proxecto no traballo de concienciación sobre o emprego do noso idioma, ou como as persoas que forman este colectivo o definen: "unha acción para dialogar coa cidadanía de forma creativa e participativa e rachar os estereotipos que rodean o galego".

CONVERS-ANDO organiza para este sábado día 12 de decembro en Vigo un encontro para que calquera de vós se achegue ao longo do día e poida coñecer de primeira man esta iniciativa.

Tedes o programa ao voso dispor nos enlaces resaltados, así como participar na súa rede social en FaceBook.
Nesta rede social atoparedes un extenso álbum de fotos doutros encontros que xa realizaron por distintos lugares de Galicia.

A nova Lei de Caixas recollerá os nosos dereitos lingüísticos?

2009-12-04T16:28:00.001-08:00

É importante que cada nova lei que se promulgue dende o noso Parlamento contemple tamén os dereitos lingüísticos da cidadanía galega.
As caixas galegas caracteizáronse ata agora por ir pasiño a pasiño na incorporaciónj do noso idioma, e mesmo un paso para adiante e outro para atrás, como fora aquela campaña de Caixagalicia que aparecía en autocolantes nos seus portelos indicando que nas súas caixas tamén se atendía en galego e que logo desapareceu.

Hoxe lemos no blog do presidente d'A Mesa pola Normalización Lingüística, Carlos Callón, que esta asociación se vai dirixir aos partidos políticos presentes no Parlamento para lles solicitaren que na nova Lei de caixas se garantan os nosos dereitos lingüísticos. Parabéns, don Carlos. Agardamos que esta xusta reivindicación sexa atendida en beneficio dun idioma que loita por ocupar o espazo que lle corresponde nunha sociedade cada vez máis ocupada polo castelán.

Tal como sinalan no seu comunicado, a Carta Europea das Linguas, "ratificada por unanimidade no Congreso dos Deputados no ano 2001, sinala no parágrafo 2.a do artigo 13 que se deben “incluír nos seus regulamentos financeiros e bancarios cláusulas que permitan, a través de procedementos compatíbeis coas prácticas comerciais, o uso das linguas rexionais ou minoritarias na redacción de ordes de pagamento (cheques, letras, etc) , ou outros documentos financeiros, ou cando sexa pertinente, asegurar a aplicación de ditas emendas.”"

Novo Decreto do galego

2009-12-04T15:42:00.000-08:00

O tema sobre a próxima derrogación do Decreto do galego é motivo de referencias na prensa a partir da declaracións realizadas pola presidenta da Coordinadora Galega de Equipos de Normalización e Dinamización Lingüística, Valentina Formoso.

Xornal de Galicia: "Mentres a Xunta dá as últimas puntadas ao novo decreto que virá substituír ao do galego no ensino, os lingüistas advirten dos perigos de eliminar a obriga de impartir o 50% das materias na lingua propia da comunidade. Segundo os Equipos de Dinamización e Normalización Lingüística (EDNL), “no caso de que se elimine esta obriga e se deixe ao libre albedrío de centros ou pais, a elección da lingua na que reciben clase os seus fillos, instaurarase un aprendizaxe de idiomas de dúas ou tres velocidades”. (podedes ler o resto da noticia premendo sobre o enlace do xornal)

Atlántico Diario: "La próxima derogación del decreto del gallego en la enseñanza por la actual Xunta y el nuevo texto que presentará este mes instaurará un aprendizaje de idiomas 'de tres o cuatro velocidades', en el caso de que elimine la instrucción de al menos un 50 por ciento de asignaturas en gallego y se deje al libre albedrío de cada centro o de los padres la elección de la lengua en la que reciben la clase sus hijos, según advirtieron los equipos de normalización y dinamización lingüística (EDNL) de Galicia."

A Nosa Terra: "Eliminar a obriga de que polo menos o 50 por cento das materias educativas se imparta en galego desembocará nun modelo de "tres ou catro velocidades" na aprendizaxe de idiomas. Así o advirten os Equipos de Normalización e Dinamización Lingüística (ENDL).

A portavoz da Coordinadora dos ENDL, Valentina Formoso, explicou que a libre escolla da lingua nas aulas poralle trabas á aprendizaxe e promoción do galego. "Isto suporía unha perda de dominio da lingua, en especial nos ámbitos urbanos, onde xa hai pouco contacto coa lingua".

Un apuntamento sobre sociolingüística

2009-12-04T09:51:00.000-08:00

Atopamos un interesante artigo sobre sociolingüística do galego escrito por Carlos Callón, presidente d'A Mesa pola Normalización Lingüística e publicado no único diario en galego do noso país, Galicia-Hoxe. Del extractamos o seguinte parágrafo:

"... o noso idioma é hoxe maioritario en Galiza se non contamos o ensino (en calquera das súas etapas: de infantil á universidade, e en calquer das súas titularidades, público, concertado ou privado), a publicidade, a etiquetaxe e a rotulaxe comercial, os prospectos dos medicamentos, a sanidade pública e privada, a atención ao público en todas as administracións, a documentación, a publicidade e as sinalizacións da Administración Xeral do Estado, as notarías, os xulgados, as radios, as televisións, os xornais impresos e os electrónicos, as revistas, os servizos de hostalaría, o transporte público, as aseguradoras, os bancos, as caixas de aforros, os supermercados, os talleres, a oferta editorial, as tendas de roupa, as conserveiras, as ETTs, a garda civil, o exército, as autoescolas, a policía nacional, os xoguetes, as estreas de cinema ou DVDs, os videoxogos, os servizos telefónicos de apoio ao cliente, os grupos máis novos en idade...".

Informe do Consello da Cultura sobre o galego nos medios

2009-12-04T09:08:00.000-08:00

O Consello da Cultura Galega publicou un informe titulado "A lingua das novas" sobre a presenza do noso idioma nos medios de comunicación. Os resultados son moi significativos e invitámosvos a coñecelos premendo sobre o enlace correspondente.

Adiantámosvos as palabras introdutoras que aparecen na web do Consello da Cultura:
"O informe analiza a situación lingüística dun dos actores sociais que máis podería ter contribuído á impulsión e consolidación do proceso de normalización lingüística do galego –os medios de comunicación– e que, por diversas causas, continúa a ser practicamente monolingüe na actualidade. O estudo é froito do traballo dun grupo de investigación que iniciou o estudo no ano 2002. Mediante o emprego de técnicas de investigación cuantitativas e cualitativas obtivéronse datos e análises non só dos hábitos lingüísticos dos medios de comunicación impresos e audiovisuais na Galicia actual senón, ademais, das actitudes e reflexións dos seus protagonistas –xornalistas e directores de medios de comunicación– e outros analistas da situación –lingüistas, sociólogos, economistas, filósofos… Pretendíase non só coñecer a lingua actual dos medios de comunicación, senón tamén as causas e consecuencias de que outra realidade posible non exista."

Por que optei polo galego?

2009-12-04T02:39:00.000-08:00

Invitámosvos a outra proposta: contardes por que optastes polo galego. Que fixo que vos decidísedes pola utilización habitual e normal do noso idioma na vosa vida cotiá.

Esta proposta está recollida directamente dunha anotación que o escritor Francisco Castro publicou no seu blog, respondendo esta mesma pregunta sobre si mesmo e que tantas respostas está motivando. Esta "confesión" de F. Castro fíxonos reflexionar sobre a importancia de que moitas persoas que decidiron empregar sempre o galego na súa vida nos contasen por que optaron por facelo e servir de aliciente a outras moitas persoas que o lean e que poidan animarse a facelo tamén.

Temos que enviarlle unha forte aperta a Francisco Castro e o noso profundo agradecemento polas continuas ideas coas que sementa este país.

Polo tanto, non vos cortedes e escribide as vosas "confesións" no apartado de "cometarios" ou enviádeas ao noso mail: eoi.vigo.enl@gmail.com

A nosa lingua mobiliza

2009-12-03T17:34:00.000-08:00

Esta é a noticia que acabamos de recibir sobre a creación dunha nova iniciativa que traballará en prol da galeguización do ensino en Galicia.

O 5 de Decembro, sábado, ás 6 e media da tarde no Centro Cívico Municipal do Castrillón ( na praza Pablo Iglesias) , na cidade da Coruña, constituíuse a Asociación "Comisión promotora de ensino: Galiza co Galego". Continuar lendo a noticia...

Asinade o voso apoio a esta iniciativa no seu blog.

Premio estatal Lazarillo para Marcos S. Calveiro

2009-12-03T14:57:00.000-08:00

Parabéns para Marcos S. Calveiro, gañador do Premio Lazarillo de Narrativa Xuvenil cunha obra en galego: O pintor do sombreiro de malvas, unha extraordinaria recreación dos últimos meses de vida do pintor Van Gogh.

Podedes ir directamente ao blog do escritor para coñecerdes de primeira man a súa propia valoración.
Xornal dedícalle toda unha páxina con detallada información sobreas características da obra.
Tamén o fai o noso único diario en galego, Galicia-Hoxe.

Novo libro sobre o noso idioma

2009-12-03T12:41:00.000-08:00

Pilar García Negro, De fala a lingua: un proceso inacabado

"Reúne este volume artigos, estudos e traballos varios de case unha década, a inicial deste século, todos eles referidos á lingua de noso...". Podedes continuar lendo o comentario sobre este libro na Editorial Laiovento.

Tendes tamén aquí un vídeo sobre a presentación desta interesante obra:

Windows 7 estará en galego

2009-12-03T02:37:00.000-08:00

Windows 7 estará en galego dentro duns meses, segundo confirmou a Secretaría Xeral de Política Lingüística. O lanzamento do sistema operativo de Microsoft na nosa lingua chegará ao mesmo tempo cá versión en éuscaro, como acontecera co Windows Vista. A versión en catalán de Windows 7 presentouse este martes, confirmando a especial atención que ten Microsoft cara ao mercado catalanfalante." Continuar lendo a noticia en Vieiros.com.

Ante esta noticia xorden varias preguntas:

Por que sempre imos por detrás do castelán na incorporación das novas tecnoloxías?
Non tiña a administración galega a previsión da aparición desta nova versión do sistema operativo Windows?
Por que outros idiomas da península coma o castelán e o catalán si teñen esa previsión?
É un gasto ou un investimento para unha administración estar á altura dos acontecementos?
Por que a nosa administración non é capaz de crear "mercados galegofalantes" á par dos "mercados castelanfalantes"?
Por que se permite dende a nosa administración que o galego sexa tratado como un idioma de segunda no noso propio país?
Por que non temos o mesmo dereito e oportunidade de ter Windows 7 en galego igual ca os demais idiomas?

Entrevista co sociolingüísta Mauro Fernández

2009-12-03T01:26:00.000-08:00

A Nosa Terra publica unha entrevista co Director científico do I Mapa Socio Lingüístico de Galicia de 1992 e profesor da Universidade da Coruña, Mauro Fernández.
Desta entrevista sacamos algunha frases que podedes continuar lendo no artigo completo:

"Cando comparamos o Censo de 2001 co de 1991, o que vemos é que non cambiou a porcentaxe de persoas que teñen o galego como lingua habitual".
"Son algúns máis os que cambiaron cara o galego cós que cambiaron cara o castelán".
"En cidades como A Coruña ou Vigo falábase máis galego a mediados dos 90 que a principios do século XX".
"Que o galego sexa aínda a lingua máis falada en Galicia é unha boa noticia".

Publicación doutra importante contribución á nosa lingua

2009-12-02T13:09:00.000-08:00

VV. AA., Sobre o racismo lingüístico, Ed. Laiovento, 2009.

"... non aceptamos resignadamente que se nos inoculen doses mortais de amnesia, que derrame ou vaporice tantos anos --décadas-- de loita pacífica, democrática e pedagóxica a prol do idioma". Estas son algunhas das palabras con que as persoas autoras deste libro presentaron a súa obra.

Felicitamos dende aquí a Edicións Laiovento por esta nova publicación sobre a nosa lingua.

Poñemos aquí dous interesantes momentos da presentación desta obra, coa intervención dun dos seus autores, o xuíz Luis Villares Naviera:

Para cantar nos aniversarios

2009-12-01T10:14:00.000-08:00

"Parabéns"

Parabéns para ti
Nesta data querida.
Moitas felicidades,
Moitos anos de vida.

Hoxe é día de festa.
Cantan as nosas almas
Para a mociña .........
Unha salva de palmas.

Seminario sobre lingua, sociedade e política en Galicia

2009-12-01T02:22:00.000-08:00

.

"O Consello da Cultura Galega comeza hoxe o seu Seminario sobre lingua, sociedade e política en Galicia. Este encontro quere facer unha ampla reflexión colectiva sobre o xeito en que vivimos o galego e a acción política encol do mesmo. O proxecto prevé intervencións dalgúns dos máis destacados especialistas na nosa lingua, así coma de reputados sociolingüistas ou filólogos doutros espazos culturais, sendo cada un deles retrucado por outro investigador." Continuar lendo a noticia na web do Consello da Cultura Galega.

Podedes acceder a máis información sobre este Seminario sobre lingua, sociedade e política en Galicia, así coma ao seu programa.